🌿 वसमतमध्ये नैसर्गिक साधनसामग्रीतून साकारली महालक्ष्मींची पारंपरिक आरास

वसमत : वसमतच्या माजी नगराध्यक्षा सौ. कमुदिनी रमेश बडवणे यांच्या निवासस्थानी यंदाच्या महालक्ष्मी पूजनानिमित्त अत्यंत आकर्षक, पारंपरिक आणि पर्यावरणपूरक देखावा साकारण्यात आला आहे. त्यांच्या दोन्ही सुनबाई सौ. प्राजक्ता बडवणे व सौ. प्रियांका बडवणे यांनी विशेष कल्पकतेने महालक्ष्मींची ही सुंदर आरास व सजावट तयार केली आहे.

या सजावटीचे प्रमुख वैशिष्ट्य म्हणजे कोणत्याही आर्टिफिशियल, प्लास्टिक किंवा प्लास्टरच्या वस्तू वा लाईटींग चा वापर न करता, अगदी नैसर्गिक पद्धतीने हा संपूर्ण देखावा साकारण्यात आला आहे. आरासीचा सर्व परिसर शेणाने सारवून, निसर्गाकडून मिळणारी पाने, फुले, केळीचे खांब, नारळाच्या झावळ्या तसेच विविध नैसर्गिक आणि पारंपरिक वस्तूंचा कलात्मक वापर करण्यात आला आहे.

या आरासीत विशेष आकर्षण ठरत आहेत ते पिढ्यान्‌पिढ्या जतन केलेले महालक्ष्मींचे पारंपरिक मुखवटे. हे मुखवटे कुटुंबाच्या श्रद्धा आणि परंपरेचा अनमोल वारसा असून, अनेक पिढ्यांपासून महालक्ष्मी पूजनात त्यांचा वापर केला जात आहे. तसेच या देखाव्यात वापरण्यात आलेल्या अनेक पारंपरिक वस्तू आणि समया तब्बल अडीचशे वर्षे जुन्या असल्याचे सांगण्यात येते. पूर्वजांनी जतन केलेला हा वारसा आजही त्याच श्रद्धेने पुढील पिढीकडे सुपूर्द केला जात आहे.

महालक्ष्मींच्या मागील बाजूस पारंपरिक वारली चित्रकलेच्या धाटणीतील कलाकुसर, नैसर्गिक रंगछटा आणि फुलांची आकर्षक सजावट करण्यात आली आहे. त्यासोबतच पारंपरिक समया, पणत्या आणि दिव्यांची सुंदर आरास करण्यात आल्याने संपूर्ण देखावा अधिकच प्रसन्न, मनमोहक आणि भक्तिमय झाला आहे.

निसर्ग, परंपरा, संस्कृती आणि श्रद्धा यांचा सुंदर संगम या महालक्ष्मींच्या आरासीत पाहायला मिळत आहे. आधुनिक कृत्रिम सजावटीपासून दूर राहून नैसर्गिक साधनसामग्रीचा वापर करत आपल्या पूर्वजांनी जपलेल्या परंपरेचे जतन करण्याचा हा सुंदर प्रयत्न आहे.

सौ. कमुदिनी रमेश बडवणे यांच्या निवासस्थानी साकारलेली ही महालक्ष्मींची आरास म्हणजे जुन्या परंपरेचा समृद्ध वारसा, निसर्गाशी असलेले नाते आणि भक्तीभाव यांचा सुरेख मिलाफ ठरत असून, या अनोख्या सजावटीचे सर्वत्र कौतुक होत आहे.